إضطرابات الطعام - بين القلق النفسي والتحديات الصحيه.
كتبت // أمنية حسام
اضطرابات الطعام بقت مشكلة كبيرة وكتير من الناس بيعانوا منها بشكل ما.
لو دخلنا في علم النفس فهنلاقي اضطرابات الطعام هي ان حالات بيتحول فيها الأكل لمشكلة أو لمصدر قلق بدلاً من إنه يكون حاجة طبيعية.
فيه أنواع كتير من اضطرابات الطعام، زي فقدان الشهية العصبي (أنوركسيا نيرفوزا)، الشره المرضي العصبي (بوليميا نيرفوزا)، واضطراب نهم الطعام (بينج إيتنج ديس أوردر).
فقدان الشهية العصبي (أنوركسيا نيرفوزا)
ده بيكون لما الشخص بيحاول يقلل وزنه بشكل مفرط وبطرق غير صحية.
الشخص اللي بيعاني من الأنوركسيا بيبقى عنده خوف شديد من زيادة الوزن، وده بيخليه يمتنع عن الأكل أو يأكل كميات قليلة جداً.
للأسف، الأنوركسيا ممكن تأدي لمشاكل صحية خطيرة جداً زي ضعف العضلات، وفقدان الشعر، ومشاكل في القلب.
الشره المرضي العصبي (بوليميا نيرفوزا)
في الحالة دي، الشخص بيأكل كميات كبيرة جداً من الأكل في وقت قصير، وبعدين يحاول يتخلص من الأكل ده بشكل غير صحي زي إنه يرجع أو يستخدم مُليِّنات.
الشخص اللي بيعاني من البوليميا ممكن يظهر بشكل طبيعي أو حتى يكون وزنه زائد شوية، عشان كده ممكن يكون صعب تمييزه عن غيره. البوليميا ممكن تأدي لمشاكل صحية زي تقرحات المعدة، والتهابات في الحلق، وتآكل الأسنان.
اضطراب نهم الطعام (بينج إيتنج ديس أوردر)
في الاضطراب ده، الشخص بيأكل كميات كبيرة جداً من الأكل بشكل متكرر، لكن من غير ما يحاول يتخلص من الأكل زي البوليميا. ده بيخليه يعاني من زيادة في الوزن ومشاكل صحية زي السكر وأمراض القلب. الشخص اللي بيعاني من اضطراب نهم الطعام بيبقى عنده شعور بالذنب والعار بعد ما ياكل، وده بيزود المشكلة أكتر للاسف.
طيب الأسباب
فيه أسباب كتير بتخلي الشخص يعاني من اضطرابات الطعام. منها العوامل الوراثية، والبيئية، والنفسية.
مثلاً، الناس اللي عندهم تاريخ عائلي لاضطرابات الطعام ممكن يكونوا أكثر عرضة للإصابة. الضغوط النفسية والاجتماعية كمان ليها دور كبير، زي التعرض للتنمر بسبب الوزن، أو الضغوط اللي بيواجهها الشخص عشان يبقى مثالي زي ما بيشوف في الإعلام.
العلاج
علاج اضطرابات الطعام بيتطلب تدخل من متخصصين في الصحة النفسية والتغذية.
العلاج ممكن يشمل العلاج النفسي زي العلاج السلوكي المعرفي (CBT)، اللي بيساعد الشخص يتعرف على الأفكار والسلوكيات اللي بتأدي لاضطراب الأكل ويحاول يغيرها.
كمان، العلاج ممكن يشمل تدخلات غذائية عشان يعلم الشخص يتناول الأكل بطريقة صحية ومتوازنة.
ـــــــــــــــــــــــــــــــــــ ـــــــــــــــــــــــــــــــــــ
مجلة مارڤيليا - Marvelia Magazine
رئيس مجلس الإدارة أ/ فريدة نصر فرج
إرسال تعليق