ميار محمود.. شغف التصميم بين التجربة والإصرار
بقلم: ميديا – مجلة مارڤيليا
"مع المحاولة لا يوجد فشل".. بهذه الجملة بدأ ميار محمود رحلته، جملة بسيطة لكنها تلخص قصة شغف وإصرار في عالم التصميم الجرافيكي.
س: في البداية، عرفنا بنفسك؟
أنا ميار محمود، درست نظم ومعلومات، لكن شغفي الحقيقي كان التصميم الجرافيكي، واللي اتحول مع الوقت لمجال أساسي في حياتي.
س: إزاي بدأت رحلتك مع التصميم؟
البداية كانت من خلال تدريب في الكلية، ومن وقتها شدّني المجال جدًا، وقررت أتعلم أكتر وأطوّر نفسي فيه.
س: بتعتمد على إيه في شغلك؟
بستخدم برامج أدوبي زي فوتوشوب وإليستريتور، خصوصًا في تصميمات السوشيال ميديا والمطاعم.
س: هل اعتمدت على التعلم الذاتي فقط؟
لا، أخدت كورسات من مصادر مختلفة، وده ساعدني أطور مستوايا وأفهم المجال بشكل أعمق.
س: أول مشروع ليك كان إيه؟
بدأت بتصميمات السوشيال ميديا، وده خلاني أفهم السوق واحتياجات العملاء بشكل عملي.
س: واجهت إيه من صعوبات؟
أكتر حاجة كانت إن النتيجة مش دايمًا بتطلع زي ما كنت متخيل، وده خلاني أشتغل على نفسي أكتر.
س: بتتعامل إزاي مع النقد؟
لو النقد إيجابي بستفيد منه، ولو سلبي بتجاهله ومبخلوش يأثر عليا.
س: إيه اللي بيخليك تكمل؟
رغبتي إني أنجح وأثبت نفسي، حتى في أصعب الظروف.
س: مين كان داعمك في رحلتك؟
ناس كتير شجعوني، وكانوا شايفين إن كل خطوة صغيرة هي بداية لنجاح أكبر، وده فرق معايا جدًا.
س: نصيحتك لأي حد حابب يدخل المجال؟
جرب كتير، واشتغل على نفسك، ومتخافش من الغلط… لأن الممارسة هي اللي بتصنع الإبداع.
س: بتستمد إلهامك منين؟
من الناس الناجحة في المجال، بحب أتعلم منهم وأشوف وصلوا لإيه.
س: أقرب شغل لقلبك؟
تصميمات السوشيال ميديا والمطاعم، بحس إني بعبّر فيهم عن نفسي أكتر.
س: تفضل تشتغل لوحدك ولا في فريق؟
الاتنين، الشغل الحر بيديني حرية، والشغل في فريق بيخليني أتعلم من غيري.
س: شايف مستقبل المجال إزاي؟
مجال التصميم مستمر ومطلوب، وأنا ناوي أطور نفسي وأجرب مجالات جديدة فيه.
س: لو لخصت رحلتك في جملة؟
"مع المحاولة لا يوجد فشل."
إرسال تعليق