التغيير الحقيقي بيبدأ من جواك
الناس كتير بتفتكر إن عشان حياتهم تتغير، لازم الظروف حواليهم تتعدل، لازم الناس تبطل تئذيهم، ولازم الدنيا تبقى أهدى وأسهل وأطيب... ويفضلوا طول الوقت مستنيين اللحظة دي، اللحظة اللي كل حاجة فيها تبقى تمام عشان يعرفوا يبدأوا.
بس الحقيقة؟ اللحظة دي مش هتيجي، ولو جات، مش هتستمر. لأن الحياة عمرها ما كانت مستقرة ولا مثالية، ومش دايمًا الناس هتبقى لطيفة، ولا الظروف سهلة... وعشان كده، التغيير الحقيقي مابيبدأش من برا، التغيير الحقيقي بيبدأ من جواك... من قرارك.
يعني إيه التغيير يبدأ من جوا؟ يعني توقف تبص حواليك وتقول "أنا كده عشان كذا"، وتبدأ تبص لنفسك وتسأل: "أنا ممكن أعمل إيه؟"، "إزاي أغير طريقتي؟"، "إزاي أكون، أنا شخص مختلف مهما كانت الدنيا حواليا صعبة؟".
طريقتك في التفكير هي اللي بتحدد رد فعلك، مش اللي بيحصل لك... يعني نفس الموقف ممكن يخلي حد ينهار، ويخلي حد تاني يتقوّى... الفرق مش في الموقف، الفرق في اللي جواه.
ابدأ بخطوة بسيطة. مش لازم تقلب حياتك كلها، ولا تاخد قرارات ضخمة... ابدأ تصحى بدري، تنضّف أوضتك، تبطل عادة صغيرة، تصالح مع نفسك على حاجة كنت بتجلد فيها ذاتك سنين... ابدأ بحاجة بسيطة وكرّرها، واستمر.
هتقع؟ أكيد... هتزهق؟ طبيعي. بس وقتها افكر: "هو أنا برجع لنقطة البداية؟ ولا حتى وأنا راجع، راجع وأنا فاهم أكتر؟". وهتكتشف إنك مش بترجع، انت بتلفّ لفة تعليم، وكل مرّة بتقع فيها بتعرف حاجة جديدة عن نفسك.
فكرة التغيير مش إنك تصحى شخص تاني، لأ، الفكرة إنك كل يوم تكون نسخة محسّنة من نفسك... والنسخة دي مش هتتكوّن بالكلام، هتتكوّن بالفعل، بالمواجهة، بالوعي، وبالاستمرارية.
ومهم جدًا تفتكر إن مفيش حد هيعيش مكانك، ولا حد هيغيّر حياتك بدالك... لازم القرار يطلع منك، من إرادتك... ومهما كان الطريق طويل أو بطيء، أهم حاجة إنك تكون ماشي... لأن اللي واقف، عمره ما هيوصل، إنما اللي ماشي، حتى لو بخطوة واحدة في اليوم، أكيد هيقرّب.
اعرف إن التغيير مش بس في شكلك أو شغلك أو علاقاتك، التغيير الحقيقي بيبدأ من جملة بتقولها لنفسك: "أنا أقدر أكون أفضل، وهبدأ دلوقتي".
صدقني، اليوم اللي تاخد فيه القرار ده بصدق، هو بداية حياتك الجديدة.
گـ منة الله بكر أبو باشا
إرسال تعليق