احمد شعبان في حوار خاص مع مجلة مارڤيليا.

 احمد شعبان في حوار خاص مع مجلة مارڤيليا. 

كتبت // فرحه وائل 

"الأسم:ـ أحمد شعبان 

" السن:- خلاص 18

"الدولة:‐ مصر

"المحافظة:- بني سويف

" الموهبة:- الكتابة والتأليف ولسه داخل الشعر من فترة

"كيف ومتى رأيت أنك تمتلك هذه الموهبة؟

 -من سنة تقريبا بدأت أدور على حاجه تسلي وقتي وتكون هواية والقدر وراني اني ليا ف الكتابة وعندي لمستي وبدأت فعليا مع مبادرة وتين بعد بوست شوفته على فيسبوك لأكتر حد عرفني الدنيا وأحب أشكرها أوي وهي المشرفة الجميلة أية أحمد عبده واللي عرفتني بعدها على وتين وكانت خير بداية ومعرفة أتشرف بيها بصراحه

"متى كانت أول بداية لك في عالم الكتابة ؟

-قبل معرض كتاب 2024 للقاهرة تحديدا شهر 7 لما بدأت أكتب أولى تجاربي واللي فشلت فيها عشان ناقصها شوية حاجات هتتظبط مع الوقت وهي رواية "أبناء حورس" وإن شاء الله أتمها على خير

"هل ستستمر فعملك ك كاتب أو هتتوجه في دراستك لعمل أخر؟و إذا عملت بعمل آخر هل هستتوقف عن الكتابه ام لا؟

-أنا الحقيقة واخد الكتابة والتأليف كهواية جابت فلوس خير مجبتش ف انا مش منتظر منها دا وبالنسبة لموضوع إني ممكن أوقف كتابة ف الكتابة بالنسبالي زي التنفس كدا أموت لو كتمتها

"هل بدأ حبك للقرأه منذ الطفوله؟وما هي أكثر القصص و الكُتب تفضل قرأتها؟

-من وأنا في تانية ابتدائي تقريبا يعني 10 سنين ف الغالب أول حاجه قرأتها كانت رواية أخدتها من عمتي لمحمد طارق اسمها "لن ينتهي البؤس" ودي وصلتني فيما بعد لمرحلة الاكتئاب اصل طفل ومسك رواية بتحكي عن الانتحار والجانب السوداوي من الحياة المفروض يبقا عامل ازاي؟! 😂

ولكن هي بالنسبالي أحب رواية ♥️

"هل يوجد كتاب غير تفكيرك؟ وما هو؟

-هي رواية "لن ينتهي البؤس" مش كتاب اه لكنها أثرت فيا ولازلت بحبها

"ما هو اكثر عمل لك تفضله؟

-عبثيات ودي كتابات مكنتش عارف اسميها ايه ف خليتها بالاسم دا ولأنها عن فلسطين بس ١٢ صفحة بس حاجه كدا خفيفة وكانت محتاجه تعديلات كتير لأنها تاني حاجه كتبتها أو حاولت أقدمها للقضية ومع ذلك دي أكتر حاجه أنا بفتخر إني عملتها ولو كانت بسيطة

"هل تفضل قرأة كتب ورقيه أم الكترونية؟

-والله محدش يكره الورقي بس الجيب وما يريد، مش أنا اللي بحدد الموضوع دا يا أستاذة فرحه 

"ما هو نوع النقد الذي تواجهه أغلب الأحيان؟

-أعمالي قصيرة، ودا مش بإيدي يا جماعة انا بزهق، بس برضو ببقا ليا هدف من دا

" من الذي كان يمثل لك الدعم؟

-أهلي طبعا وصحابي بصراحه لما بدأت وهم عارفين اني على الله والطريق قدامي طويلة بس لسه ف ضهري، وشخص تاني بحبه 

"من هو مثلك الأعلى في عالم الكتابة؟

-حنان لاشين، كتاباتها للشباب وأعمالها هادفة بشكل ملحوظ

" ما هو أول نص لك؟

-أول خاطرة كانت في كتاب جروح تلتئم بإشراف أية أحمد و إدارة وتين وكان لمجموعة مؤلفين انا منهم بس مش فاكر كانت ايه بصراحه

" هل يوجد نص تحضر لتقديمه ، وما الذي ستتحدث عنه فيه؟

-رواية شغال عليها وقررت إني أديها كل الوقت والمجهود اللي محتاجاه حتى لو قعدت فيها سنتين تلاته بس تكمل لأنها عن القضية وبشكل مختلف عن أي رواية موجوده وأنا عارف انها هتنجح أكيد لو خدت وقتها بإذن الله 

"هل يوجد كاتب اقدم لك الاستفادة وتعلمت منه سرد النصوص؟ 

-طبعا أول شخص فادني كانت أية أحمد لأني دخلت عالم الخواطر وأنا لا أفقه فيه شيء واتعلمت منها مع الوقت كل اللي انا بكتبه حاليا

"ما هي الخبرات التي اكتسبتها من كونك كاتب؟

-إني أقدر أتعامل مع الناس لأني كنت مشرف في المبادرة واتعاملت مع بشر كتيييير اوي والحمدلله استفدت سواء ثقافيا من إني بشوف كتابات عشرات من المؤلفين والكتّاب أو اجتماعيا اني اتعرفت على ناس جميلة جدا 

" هل يوجد إنجازات أو جوائز حصلت عليه؟  

-اه أخدت شهاده ليا ولوالدي ولوالدتي من المبادرة و في لسه درعين و شهادات جايه في الطريق

"شاركنا بمثال عن وقت استطعت التعامل فيه مع أحد التحديات.

-وقت الحوار دا يمثل بالنسبالي تحدي لأن الدنيا مش أحسن حاجه حاليا، واللي أقدر أقوله وأقدمه أن مفيش حل غير الصبر وربنا موجود يعني ف أكيد هتتحل مش هتتساب كدا

" ماذا تمثل لك الكتابه؟ 

-حياتي

"ما الذي تتوقع أن يحدث يجعلك تتوقف عن "الكتابة ؟وهل إذا حدث يمكنك فعلا التوقف؟

-المشاغل الكتير، ودا اللي هيحصل بعد كام شهر، الدراسة هتبدأ وأهم سنة دراسية إن لم تكن الأهم هي السنة دي ولكن أكيد مش هوقف كتابة هرجعلها من وقت للتاني عشان أقدر استمر في المدعكة اللي هواجهها

-ماهي رؤيتك للجريدة؟ 

-دا علم غيب؟ مش عارف بس موفقين بإذن الله

-هل يوجد نصائح تقدمها لنا لتطوير الجريدة؟

_بصراحه معنديش لأني منبهر بجودة الأسئلة ولكن نقول أي حاجه عشان نبان فاهمين وكدا، كتروا حوارات صحفية مع الشباب الموهوب لأن دا هيفتحلهم طرق هم محتاجينها 

" كلمه تود ان تختتم بها هذا الحوار:-

_ بتابع شخص اسمه احمد ابوزيد على دروس أونلاين ودا من الشخصيات المؤثرة بشكل عام وفي كل نهاية بودكاست بيعمله مع حد بيخليه يقول جملة بيحبها أو مؤمن بيها ف انا هنتهز الفرصة وأقول آية أنا مؤمن بيها جدا

"‏وَأَنْ لَيْسَ لِلإِنسَانِ إِلَّا مَا سَعَى"

وبس كدا اتشرفت باللقاء دا جدا وشكرا ليكي يا استاذة فرحه وشكرا لمجلة مارڤيليا وشكرا يا وتين لأنك دبستيني التدبيسة دي لولا إنك حطيتيني قدام الأمر الواقع مكنتش هعمل الحوار دا.