مقال بعنوان " أسر الجامعات وتأثيرها على الشباب"
كتبت // فريدة نصر فرج.
النهارده هنتكلم عن موضوع مختلف وهو أسر الجامعات، معظمنا مكنش عنده فكره يعني اي اسر ولا دول بيعملوا اي كنا ندخل الجامعه نلقيهم بيقولوا اسرة كذا واسرة كذا؛ لكان محدش فينا يعرف دول اي او بيعملوا ايه.
النهارده قرارنا ندخل جو الموضوع دا وهنتكلم عنه اسر الجامعة واهميتها لشباب وعشان من المعروف ان احسن حد يوصل المعلومه هو الانسان اللي في نفس السن فهنتكلم مع شاب من اسر الجامعات.
"تحت عنوان من الشباب الي الشباب."
شاب زيه زينا دخل الجامعه مش فاهم اي الأسر ولا بتعمل اي هيشرحلنا اي هي وبتعمل اي.
معانا ومعاكم انهارده القائد احمد ساهر، المعروف في الأسر باسم ساهر، عنده 21 سنه، طالب في كلية الآداب جامعة عين شمس فرقه تالته قسم الجغرافية، عنده خبره ٣ سنين في نشاط الجامعه، وطلع خمس معسكرات تبع الجامعة.
اهلا بيك يا قائد.
- اهلا بحضرتك
ممكن تشرحلنا يعني اي نشاط الجامعه، وليه بتسمه اسر ؟
- بالنسبة للنشاط فهو عمل تطوعى انشئه بعض الطلبة بغرض انهم يساعدو بعض و يساعدو زمايلهم تحت اشراف الكليات والجامعة متقسمين لتيمات تحت مسمى الاسر مبدئيا ليه بنقول عليها اسرة مش تيم او club ذي الجامعات التاني فدا علشان احنا حرفيا بنبقا اسرة بنعرف بعض و نساعد بعض و بنخاف على بعض وكل دا بيحفزنا اننا نادى فالنشاط والنشاط عمتا بالنسبالنا هو لعبة فيها مكسب و خسارة بس مش لعبة فور فان لا هو بيتعامل كانه رياضة بنتعلم و نتدرب علشان نادى فيها
طب ليه كل دا يا قائد؟
- دا لان ذي مقولت فالاول احنا متقسمين تيمات(الاسر) فبيبقا فى مابينا منافسة بس منافسة نضيفة بنساعد بعض و بنقدم كل الدعم لبعض بس بيجى اوقات بنبقا بنتنافس بنشوف مين فينا هيقدم شغل احسن من التانى.
ممكن تشرحلنا باستفاضه اكتر يا قائد؟
- بالنسبة لشغلنا كاسر فهو مش مقتصر على مجموعة شباب عاملين شلة كبيرة علشان يقعدو مع بعض و يهزرو و يخرجوا ذي ما ناس كتير فاكرة بالعكس احنا بنطلع معسكرات و بنحضر سيشنات و ندوات علشان تعلم مهارات جديدة و سوفت سكيلز نقدر نستخدمها علشان نساعد بيها زمايلنا حاليا و نساعد بيها نفسنا فسوق العمل مستقبلا بندخل الاسر نتعلم و نستفاد فالمقام الاول علشان بعد كدا نقدر نفيد ونساعد
ممكن تقولنا يا قائد انتم كاسر بتستفيدو اي من الايفنتات والحملات اللي بتتعمل، وازاي بتصرفوا عليها من غير ميجيلكم مقابل مادى؛ يعني بضيعوا وقت و مجهود و فلوس علي النشاط منغير مقابل؟
- احب اصححلهم المعلومة دى لان الموضوع غير كدا خالص وبرضو اصحح معلومة ان شغلنا دا سهل و ان احنا مكبرين المواضيع
بالنسبة ليه احنا بنعمل كدا فدا لان ذي ما بتاخد لازم تدى مينفعش تدى بس ولا تاخد بس بمعنى ان اى طالب بيخش النشاط وبيبقى من ضمن اسرة ويتقال عليه طالب نشاط فهو اولا بيعمل علاقات كويسة وبيعرف ناس بعد كدا ممكن يبقو اقرب حد ليه بيبدا بعدها يحضر سيشنات و معسكرات بيتعلم فيها مهارات كتير لو فكر ياخد فيها كورسات هيدفع مبالغ محترمة فبالتالى هو اخد معلومة قيمة منغير ميدفع فيها مبالغ بياخد المعلومات المبدئية اللى تخليه يقدر يبدا فاى مجال بس برضو هى يدوبك تحطه على اول الطريق ولازم يجتهد و يتعلم اكتر علشان ينجح و يستمر
بعد ما بنتعلم وبناخد استفادتنا بيجى دور ان احنا نفيد و دا بيبقا عن طريق الايفنتات و الحملات اللى ليها دور كبير فمناقشة قضاية مهمة فوقتنا الحالى وليها دور فنشر معلومات قيمة لاكبر عدد ممكن من الطلبة ودا لانى ذي مقولت مينفع اخد منغير ما أدى
- بالنسبة للمجهود اللى بنبزله فبيبقا كبير و طبعا الطلبة او اى شخص بيحضر حملاتنا او افنتاتنا او اى شغل بنعمله بيبقا مبهور من الشغل اللى قدامه منغير ميعرف الكواليس . . الكواليس اللى بيبقا فيها تفكير كتير علشان بس نلاقى فكرة نشتغل عليها الكواليس اللى بيبقا فيها تخطيت كبير علشان نقدر نقدم شغل منظم الكواليس اللى بيبقا فيها سهر للتحضير ولف على محلات وتجار علشان نجيب ماتريال للشغل الكواليس اللى بيبقا فيها تعب و مجهوك كبير علشان نطلع حاجة محترمة.
هل تنصح الطلاب انهم يكونوا جزء من اسر الجامعه؟
- هى تجربة حلوة وبنطلع منها بعلاقات كتير و دايرة معارف كويسة دا غير طبعًا الاستفادة الشخصية قنصحهم ميضيعوش التجربة دى و يعملو حاجة فالجامعة تخلى اسمهم يتردد حتى بعد ما يتخرجو يعنى ميبقاش ذي ما دخلو الجامعة ذي ما خرجوا منها واهم حاجة يسيبو اثر كويس
" يموت الانسان ويبقى اثره الطيب"
طبعًا انت في خلال فترة التالت سنين دول قابلت مشاكل في اسر الجامعه؛ ممكن تحكلنا مواقف منهم؟
- من اكتر المشاكل اللى ممكن تقابل اى طالب فالبداية هى التأقلم فى اشخاص بيبقا صعب عليهم انهم يتاقلموا بسرعة
- ممكن يواجهو مشاكل فتنظيم وقتهم وانهم ينثقو بين الدراسة والشغل لو بيتشغلو وبين النشاط بس كل دا امره سهل وبيتهند بيكون محتاج تعود مش اكتر.
طب لو قولنا لحضرتك انك تقدم نصيحه للطلاب اللي حابه تدخل النشاط، هتكون اي النصيحه؟
- يختار كويس الاسرة اللى هينضم ليها لان ذي ما فى مميزات فى عيوب فى اسر واخدة النشاط بيزنيس وربح و مبيفرقش معاهم الطالب
فاهم حاجه يختارو الكيان اللى هينتمو ليه لان الموضوع مستمر و ممتد حتى بعد التخرج
وفي نهاية هذا القاء تحب تضيف حاجه تانيه يا قائد؟
- حابب اقول ان انا حاليًا بعد 3 سنين كطالب نشاط اقدر اقول انى ممتن جدا للمكان اللى انا فيه ممتن لاى شخص قابلته و قدم ليا اى نوع من انواع المساعدة او قدم ليا معلومة فادتنى وكل دا منغير معرض عليه ممتن جدا لاسرة ابدا اللى كانت السبب فانى احب النشاط واحب اللعبة الحلوة و خلتنى اقدر ابان وأسمى يظهر و يبقا معروف مين هو ساهر و يقدر يعمل اى و شغله عامل ازاي . . اسرة ابدأ بقالها 13 سنة فكلية الاداب وان شاء الله مكملين وان شاء الله هنستقبل ونخرج اجيال تانية تحب النشاط واللعبة.
إرسال تعليق