الرسام هو الشخص الوحيد الذي قد يجعل من موهبته تجسيدًا لما يلوح في خياله.
كتبت // فريدة نصر فرج
الفنان الشابه سلسبيل حسين
و هوايتها الرسم
هذه المره ستكون رحلتنا معها مختلفه قليلًا فسندعوها هي من تتحدث عن نفسها هذه المره ولسنا نحن من سنتحدث عنها..
أنا سلسبيل حسين هوايتي هي الرسم..
بدأت من صغري ٧ سنين ماما كانت بتجبلي قصص مرسومه و ألونها بدأت واحدة واحدة بأني أشف الرسمه و الونها وبعدين ابتديت احاول ارسم انا و الون كمان وكان كل رسمي كارتون كان بيطلع مضحك جدا وفعلا الرسمه مش حلوة .
بسبب مسكتي للموبيل كتير نزلت ابلكيشن اسمه اسكتش بوك زيه زي الورق بالظبط بس الفكرة موفرلي ادوات و فرش كتير وكل الاوان .
ورسمت اول مرة شخصيه كانت أحمد حلمي ..
ونزلتها ع الانستجرام وعملتله منشن و اتفاجئت بأنه نزلها عنده ودي كانت البداية .
وقتها مكنتش اعرف ان الرسم ع الموبيل اسمه digital art اصلا.
ابتديت ارسم كارتون و أصحابي وأنزل علي مواقع التواصل الاجتماعي ومنها الانستجرام.
وكنت برسم ممثلين و بلوجرز مشهورين واعملهم منشن و يشوفوها فا ينزلوها عندهم.
وكده رسمي يبتدي يتعرف.
لحد ما في مرة ولد دخل طلب مني رسمه وبيقولي بكام وانا كنت معتادة ع اني ارسم ببلاش وبدأت ارسم
و ساعتها قولتله الرسمه بـ ٣٠ جنيه وطبعا دة وقتها مكنش ليه اي علاقة بالسعر اللي الفنانين بيرسموا بيه…
كنت متابعه على السوشيال فنانين رسمهم حلو و بواقعيه مش ممكنه ..
كنت كل ما ادخل و اسئلهم بيعملوا ازاي كانوا يقلولي ادخلي و جربي محدش كان بيجاوب إجابة مباشرة ..
ابتديت من خلال اليوتيوب واتفرج ع فيديوهات واروح اطبق ع الرسمه ..
لحد ما ابتدي يطلب مني اوردرات وكانت كلها اون لاين ببعت الرسمه بس..
و بعدين اطلب مني رسمه تابلوه ابتديت اطبع الرسومات ع خشب و ابتديت اعرف احسن الانواع .
وكان متوقف ع القاهرة والجيزة بس لحد ما اطلب مني اوردر من السعودية و وقتها انا مكنتش مصدقة و بعدها اطلب من الكويت و تركيا و الحمدلله الرسم ابتدأ داخل و خارج مصر.
و عملت براند بأسمي و سميته bella art
و كان عندي وقتها ١٥ سنه و لما تميت ١٧ جوجل وثقت البراند بتاعي و عملتلي داتا ..
حلمي فنون جميلة من صغري و ٣ث ربنا مأردش اني ادخل فنون جميلة..
وقتها كنت شايفة خلاص حياتي وقفت و اي كلية تانية مش هعرف انجح فيها .
دخلت معهد عالي دراسات نوعيه قسم نظم و معلومات إداريه وبرمجه.
و بالصدفة بعد دخولي المعهد كان في مسابقة الوزارة عملاها للرسم ع مستوي جامعات ومعاهد مصر.
اشتركت فيها واخدت مركز تالت جمهورية على مستوي جامعات ومعاهد مصر الحمدلله.
وكان في ٣ث مشتركة في مسابقة في قصر الثقافة والفنون و النتيجه طلعت وانا في اولى جامعه والحمدلله اخدت مركز تالت جمهورياً ع مستوي الجمهورية..
و ابتديت احب المعهد واحب دراستي و اقتنعت ان دائما اختيار ربنا لينا أحسن بكتير من اختيارنا وان اللي عايز يوصل لهدفه يثق بالله و يتأكد انه هيوصله مهما الناس احبطيته .
زي ما حصل معايا في البداية ومحدش كان فاهم لسة اية الرسم الرقمي و فكرينه فوتوشوب.
و كان في مسابقة في المعهد من وزارة التعليم العالي للرسم اشتركت فيها واخدت مركز تاني جمهورياً من وزارة التعليم العالي..
و اتبعتتلي دعوة لحضور منتدي مؤنث عالم لتكريمي كأصغر سيدة اعمال لتوثيق البراند بتاعها من جوجل رسمياً، و كنت بحلم اكون من ضمن تيم مشواري و بالفعل الحمدلله بعد سنه من المحاوله و المعافره و الاختبارات دخلت مشواري و بقيت من ضمن الفريق ، مدربه مهارات حياتيه للنشئ تابعه لوزاره الشباب والرياضة و منظمه الامم المتحدة اليونيسيف.
في النهاية عايزة اقول كل دة مش اجتهاد مني دة توفيق من ربنا و علشان صدقت حلمي.
عايزة أشكر بابا وماما لأنهم السبب الاول و الرئيسي لدعمي واني أكمل .
والى هنا فقد انتهت رحلتنا مع المتالقه سلسبيل حسين وتتمنى لها أسرة المجله دوام التوفيق والنجاح.
إرسال تعليق