الإضطرابات الأسرية - مجلة مارڤيليا.

الإضطرابات الأسرية - مجلة مارڤيليا. 

كتبت // ميرنا صقر 

-كتير بنسمع عن الأسرة المُضطربة والنهاردة هنعرف بعض مواصفاتها ..

▪︎ أوڤر دوز خناقات ومشاكل .. 

 

   الأسرة المُضطربة: 

 - أسرة مش موجود فيها رعاية أو دعم مُستمر للطفل سواء من الأب أو الأم ودايمًا فيها خلاف ومشاكل بإستمرار، مفيش حد بيقوم بدوره الطبيعي سواء الأب أو الأم أو الأطفال، فبالتالي ده بيعمل خلل في الأسرة ومتطلباتهم وإحتياجاتهم الطبيعية من بعضهم البعض .

 - الأهل بيقللوا من بعض ومن ولادهم، وهما متخيلين إن ده تشجيع ولكن بيحصل العكس و بيسبب لهم أذي نفسي وأوقات كتير الطفل بيحس بعدم الإنتماء وإنه دايمًا مش محبوب ومنبوذ منهم.

 - مبيعبروش عن مشاعرهم الطبيعيه ومش مسموح لأطفالهم التعبير براحة وثقة عن اللي حاسينه فبالتالي الطفل بيحس بالذنب ناحية المشاعر الفطرية الطبيعية. 

 - بيسيئوا لبعض نفسيًا وجسديًا ومعتمدين على التهديد والترهيب لتنفيذ أوامرهم ما بين بعض .

‐ ممارسة العنف اللفظي والجسدي ووجود سلوكيات إدمانية عند أحد الوالدين أو كليهما زي إدمان الأكل أو الجنس أو المخدرات أو الكحوليات..

 -كل المواصفات دي بتعمل خلل في نشأة الطفل وتربيته لحد ما ينضج و يكبر، ولكن بشكل لا واعي منه بيختار أدوار يعيش فيها نتيجة إضطراب أسرته .. 

-الضحية بيختار يلعب الدور ده علشان يمنع عن نفسه مسؤوليات ويقدر يحس بأهميته وباهتمام اللي حواليه

 -المُنقذ وهو اللي بيحُمل نفسه مسئولية اللي بيحصل لأفراد عيلته من حواليه وبيحاول يرضي الكل أو يحل مشاكلهم وده كمان بيأثر على صحة الطفل النفسية جدًا..

-الجاني وده أصعب دور لأن الطفل بيبدأ يكتسب من أسرته نفس الصفات والمواصفات والقناعات الخاطئة وهيستمر فيها لحد مرحلة الكِبر..

 - مهم جدًا نعرف إن الأطفال مالهمش ذنب في مشاكلنا ومش المفروض يدخلوا في مشاكلنا؛ لأن ده بيأثر على صحتهم النفسية، و ننصح بشدة إن كل زوج وزوجة مُقبلين عالزواج أو بالفعل متزوجين مش عيب ولا غلط ولا حرام إنك تتعلم " كيفية تربية طفل سوي " أو لو بتعاني من مشاكل نفسية هيكون أفضل قرار تاخده في حياتك إنك تكسر القاعدة و تحل مشاكلك النفسية .